في رسالة استغاثة من زوجة المعتقل السيد سلمان تقول: "زوجي منذ شهرين تقريبا راح مستشفى المنيل عشان يعمل عملية في واحدة من عينه اللي كان فيها أمل يشوف بيها لإزالة الماية البيضا و تصحيح مشاكل الشبكية
(العين الثانية من الإهمال في معالجته أكثر من سنتين الطبيب قاله مفيهاش أمل)
اللي حصل إنه بعد أكثر من ذهاب و مجيء للمستشفى لمدة شهور كثيرة دون علاج .. أخيرا راح من سجن بدر لمستشفى المنيل لإجراء الجراحة في عينه
كان من المفترض دكتور استشاري هو اللي حيعملها .. لكن هناك قالوا الدكتور بقاله كذا يوم مش بيجي
و دخل دكتور تاني اسمه أحمد حجازي لعمل العملية لزوجي ..
العملية مفروض تستمر ٤ ساعات مع بنج موضعي في العين ..
العملية استمرت ٩ ساعات كاملة مع زوجي !
و حصله نزيف في عينه في العملية دي ..
وكان سامع كل كلامهم وقت العملية .. و تعب جدا
و سمع الطبيبة اللي كانت مرافقة للدكتور وقت الجراحة إنه كده مش حيشوف بيها تاني
الدكتور بدل ما يعالج زوجي تسبب في إفقاده بصره !
إدارة سجن بدر متواطئة في ده …
زوجي قبلها بحوالي أسبوعين كمان راح المستشفى والاستشاري كان موجود و قاله حعملهالك حالا .. لكن إدارة السجن رجعته ..
و المرة دي ودوه و هما على علم بأن الطبيب الاستشاري غير موجود .. و الطبيب اللي أجرى الجراحة منعرفش هو ممارسته ايه !
زوجي بقاله سنتين بيطلب يتعالج
و قبلها برضه تسببوا في تلف في بصره في مستشفى وادي النطرون و أجروا عملية له مرتين دون تخدير نهائي!
زوجي بقاله ١٠ شهرر تقريبا كل شوية ينزلوه عشان يعمل العملية و يركب عربية الترحيلات رايح جاي .. و كمان في شهور الصيف شديدة الحر في القاهرة .. و يرجعوه تاني
كانوا بينزلوه يتعذب في المشوار و الحر و يرجع .. يمكن يموت و يرتاحوا منه!
و في الآخر تسببوا في فقد بصره عمدا .. و كلامي مش مبالغة!
احنا عايزينه يتعالج على حسابنا برة بقالنا سنينن بنطالب بده
عايزين نلحق عينه يمكن يكون فيه أمل يرجع يشوف بيها .. و الله على كل شيء قدير
انقذوا زوجي من سجن بدر"
